credit ns7.tv
புதுச்சேரியில் ஆளுநர் கிரண்பேடி தலைமையில் நடைபெற்ற மாநில திட்டக்குழு கூட்டத்திலிருந்து, முதலமைச்சர் நாராயணசாமி மற்றும் அமைச்சர்கள், திடீரென வெளிநடப்பு செய்ததால் பரபரப்பு ஏற்பட்டது.
புதுச்சேரியில் 2019 - 2020-ம் நிதி ஆண்டிற்கான நிதிநிலை அறிக்கை, இம்மாத இறுதியில் தாக்கல் செய்ய திட்டமிடப்பட்டுள்ளது. இந்நிலையில் நிதி ஆதாரம், துறை வாரியாக பட்ஜெட்டுக்கு நிதி ஒதுக்கீடு செய்வது உள்ளிட்டவை குறித்து ஆலோசிப்பதற்காக, மாநில திட்டக்குழு கூட்டம், அதன் தலைவரான ஆளுநர் கிரண்பேடி தலைமையில் இன்று நடைபெற்றது.
இதில் முதல்வர் நாராயணசாமி மற்றும் அமைச்சர்கள், அனைத்து துறை செயலாளர்கள் பங்கேற்றனர். இந்நிலையில் கூட்டம் தொடங்கி நடைபெற்று கொண்டிருந்தபோதே, முதல்வர் நாராயணசாமி, அமைச்சர்கள், எம்.பி.,க்கள் கூட்டத்திலிருந்து திடீரென வெளிநடப்பு செய்தனர். பின் செய்தியாளர்களை சந்தித்த நாராயணசாமி, திட்டக்குழு கூட்டத்திற்கு அதிமுக, திமுக, பாஜகவை சேர்ந்த சட்டமன்ற கட்சி தலைவர்களை அழைக்காததை கண்டித்து, வெளிநடப்பு செய்ததாக தெரிவித்தார்.
முதல்வர் செய்தியாளர்களை சந்தித்து கொண்டிருக்கும்போதே, அங்கு வந்த ஆளுநர் கிரண்பேடி, தனது தரப்பு நியாயத்தையும் ஊடகத்திடம் தெரிவிக்க வேண்டுமென தெரிவித்தார். இதனால், அங்கு பரபரப்பு ஏற்பட்டது. இதனையடுத்து செய்தியாளர்களை சந்தித்த கிரண்பேடி, எதிர்க்கட்சி சட்டமன்ற கட்சி தலைவர்கள் பங்கேற்க வேண்டுமென்ற கோப்பை, தலைமை செயலாளர் மற்றும் திட்டக்குழு செயலாளருக்கு அனுப்பிவிட்டதாகவும், அவர்கள் தான் அந்த கோப்பை பார்க்கவில்லை, என அதிகாரிகள் மீது குற்றம்ச்சாட்டினார். மேலும், அடுத்த சனிக்கிழமை விதிமுறைகளின்படி, மீண்டும் திட்டக்குழு கூட்டம் நடைபெறும், என தெரிவித்தார்
