credit ns7.tv
இந்தோனேசியாவில் குழந்தைகளுக்கு புத்தகம் வாசிக்கும் பழக்கத்தை ஊக்குவித்து வரும் ஷேர் ஆட்டோ ஓட்டுநரை, பல்வேறு தரப்பினரும் பாராட்டி வருகின்றனர்.
“உடலுக்கு உடற்பயிற்சி எப்படியோ, அதுபோல மனதுக்கு பயிற்சி புத்தக வாசிப்பு..”என்று கூறியவர் உளவியல் அறிஞர் சிக்மண்ட் ஃப்ராய்ட். அந்த வகையில் புத்தகங்களை உயிர் மூச்சாக கருதுவோர், இவ்வுலகில் ஏராளம். கடந்த 2016ம் ஆண்டு நடத்தப்பட்ட ஒரு ஆய்வில், உலகின் புத்தக வாசிப்பு பழக்கம் கொண்ட நாடுகளின் பட்டியலில், கடைசிக்கு முந்தைய இடத்தில் இடம்பெற்றது இந்தோனேசியா.
இதைத் தொடர்ந்து, இளம் தலைமுறையினர் மத்தியில், புத்தகம் வாசிக்கும் பழக்கத்தை ஊக்குவிக்க, இந்தோனேசிய அரசு பல்வேறு நடவடிக்கைகளை மேற்கொண்டு வருகிறது. இது ஒருபுறம் இருக்க, ஷேர் ஆட்டோ ஓட்டுநர் ஒருவர் தமது வாகனத்தையே நடமாடும் நூலகமாக மாற்றி, சிறுவர், சிறுமிகளுக்கு சேவையாற்றி வருகிறார்.
ஜகர்தா நகரில் கடந்த 2017ம் ஆண்டு ஷேர் ஆட்டோக்களுக்கு தடை விதிக்கப்பட்டதால், கினாங் என்ற அந்த ஓட்டுநர் தமது வாகனத்தை நடமாடும் நூலகமாக மாற்றிவிட்டார். தம்மிடம் கிடைத்த புத்தகங்களை, வாகனத்தில் ஏற்றிக் கொண்டு வீதி வீதியாக செல்லும் கினாங்கிற்கு, இளம் ரசிகர்கள் ஏராளம். அவரது வாகனம் வந்து நின்றவுடன், குழந்தைகள் தங்களுக்கு பிடித்தமான புத்தகங்களை எடுத்து படிக்கின்றனர். பெரும்பாலும் காமிக்ஸ் புத்தகங்களை எடுத்து வரும் கினாங், குழந்தைகளுக்கு அதை கற்பிக்கவும் செய்கிறார்.
